一口和味 (元朗)

不經不覺, 師傅都有好一段時間冇單獨和好友食家"乜都放入窿"食飯, 冇辦法啦, 呢期大家各有各忙, 各有目標嘛! 不過最近好友靚仔正哥, 大隻佬和酒吧老闆聯手創業, 開食店, 仲要揀左喺元朗呢個地方紮根! 呢個地方話晒都係師傅半個地頭, 加上師傅和好友食家"乜都放入窿"作為佢地嘅老死, 冇可能唔撐, 於是昨天亦攪左個乜東飯局之一口和味!

先至聲名, 雖然師傅和食店東主屬好友關係, 不過師傅絕對會憑良心報導真相, 保証呢個食評係公正的, 絕經得起考驗! 閒話休提, 昨晚大約七時和好友食家"乜都放入窿"由九龍出發, 齊齊搭公車入去, 呢個時間都入去, 就足見師傅和好友食家"乜都放入窿"係幾咁有“刻”呢, 大約一個鐘到嘅車程就到達目的地, 落車沿著地址搜尋, 好容易就搵到間食店!

由於事前沒有向東主透露半句, 絕對係突擊, 所以去到食店亦未見到任何一位老闆! 其實在食店門外, 已經見到人亦唔算多, 直頭可以用小貓三隻黎形容! 如果平時見到咁嘅場面, 師傅肯定卻步, 但由於是次係專誠入黎, 所以絕對冇腳軟, 於是和好友食家"乜都放入窿"咁入黎照行入食店!

入到去食店, 望下張柯打紙, 都有幾多唔同選擇, 於是亦詢問下店員有咩推介, 再和好友食家"乜都放入窿"商量後, 就一口氣柯打左以下食物! 秘制勁辣魚蛋一串, 秘制炸燒賣一串, 板燒神秘牛仔骨兩份, 炸芝士年糕一份, 燒牛舌兩串, 燒免治雞肉棒兩串, 炸芝士雞卷一份, 板燒黃芥辣豬下青一份, 鐵板餃子(泡菜)一份和板燒香草羊架兩件!

落完單等一陣就有得食, 而最先登場的係大家都應該估到係秘制勁辣魚蛋同埋秘制炸燒賣! 先講下秘制勁辣魚蛋, 魚蛋體積屬細細粒型, 雖然係細粒, 不過入口都幾彈牙, 絕不粉口, 加上秘制咖哩醬香香辣辣, 而且辣嘅程度合乎師傅嘅口味, 絕對係惹味嗰種, 勁正呀, 食得辣嘅絕對要一試; 至於秘制炸燒賣真係炸得好脆, 而魚肉身亦唔會有太韌和太膠嘅感覺, 炸左後亦有少少魚肉嘅香味, 再配上秘制咖哩醬, 非常之正!之後嘅食物亦陸續登場, 先講下板燒神秘牛仔骨, 牛仔骨屬於半肥瘦, 肉質非常鬆軟, 絕不韌身, 加上燒得香時牛仔骨亦帶出少少牛味, 真的非常吸引, 而且調味洽到好處, 絕對係必食之選! 炸芝士年糕一份有三隻, 外面炸得脆, 而內裡嘅年糕煙煙韌韌, 配上芝士甚香, 香而不膩, 加上芝都有少少流心嘅效果, 真的不錯! 炸芝士雞卷亦炸得好脆, 不過呢個芝士味就欠奉, 幸好餡料內不太乾身, 但師傅就覺得冇咩特別! 再黎就係燒牛舌, 牛舌算係屬於幾厚身, 咬了一口後, 發覺口感一流, 皆因牛舌係爽口中帶鬆, 軟綿綿嘅感覺好正, 味道非常討好, 如果呢油能再少啲, 相信會更加吸引, 不過呢一刻嘅牛舌已令師傅欲罷不能, 另一必食推介! 師傅另一個至愛就係燒免治雞肉棒, 起初還以為係就咁免治雞肉, 餡料裡求其擺幾粒洋蔥, 點知入口後發現餡料除免治雞肉外, 還撈埋了雞軟骨, 呢個雞軟骨真係不得了, 令到個燒免治雞肉棒入口除左鬆之外, 仲有一種清爽口嘅感覺, 好似加左馬蒂咁, 不過就比馬蒂乾身, 加上爽口得黎絕不硬, 唔會令到牙肉受傷或受損, 呢個燒免治雞肉棒絕對係必食之選, 師傅大力推介!板燒香草羊架亦係師傅另一推介, 羊架嘅“嘥屎”都幾大件, 而且燒得好香, 肉質鬆軟而味道香酥, 揸住條骨黎食, 係另有一番風味, 加上只賣兩草野一件, 絕對係大件夾抵食, 嗜羊者不能錯過! 板燒黃芥辣豬下青就比較特別, 豬下青即係豬頸肉, 肉身爽口絕對唔乾身亦唔硬, 擦上黃芥辣亦唔太攻鼻, 師傅就算唔太鍾意食芥辣亦接受到, 想試新野應該要試呢個! 最後係鐵板餃子(泡菜), 一客有三隻, 餃子皮脆而不硬, 餡料帶微辣, 不過略嫌咸少少, 呢個較為普通!食左咁多野後, 當然一定要試埋呢度嘅一口炸雪糕, 一份有三粒, 入口覺得皮脆, 但厚身, 細看下才知原來係雪糕糯米慈, 唔怪之厚身啦, 不過外熱內凍又真係幾得意, 呢個一口炸雪糕絕對值得一試!總括黎講食物質素不俗, 有驚喜, 店內環境唔算大, 不過就乾淨清潔, 而店員亦服務有禮, 價錢就非常相宜, 食左咁多野, 每人都係一百一十元正, 但就食到師傅和好友食家"乜都放入窿"勁飽, 非常抵食! 師傅同好友食家"乜都放入窿"呢個乜東飯局之一口和味真係幾和味, 唔計私人因素都肯定會有下次, 笑臉係值得一比! 呢一刻師傅張枱面已經濕晒, 皆因一想起燒免治雞肉棒就已經不停流口水了!

豪隍點心 (尖沙咀)

師傅同好友食家"乜都放入窿"食完碗咁靚嘅粥後, 就喺佐敦四圍行下, 然後不經不覺咁慢慢行左落老尖, 而好友食家"乜都放入窿"嘅身體開始慢慢恢復過黎, 於是又提議再搵野食, 而師傅當然樂意奉陪啦!

行到入厚福街, 好友食家"乜都放入窿"就提議黎呢間食店試下, 食點心師傅當然冇問題啦, 於是就行埋去攞位, 由於時間都比較夜, 所以唔使等位就已經可以直入! 坐底後立即商議柯打咩點心好, 最後一至決定柯打三文魚蝦春卷, 墨西哥叉燒包, 黃沙豬潤腸粉, 金錢肚同埋菜苗餃!

呢五款點心確實令人期待, 落完單等左一陣就已經有得食, 第一款登場的點心係三文魚蝦春卷, 長長的春卷淨係賣相已經吸引, 咁長嘅春卷師傅筷子都唔用, 就咁落手食, 點知一攞起差少少淥死, 因為真係即叫即炸, 等師傅修正後先放到入口, 入口發覺春卷熱辣辣, 勁脆口, 而裡面嘅餡料有大大粒三文魚, 味道已經可口, 再配上少少蝦肉份外爽口, 呢個點心絕對係必食之選!接住落黎就試下個墨西哥叉燒包, 墨西哥包師傅食過, 叉燒包師傅都食過, 但兩樣變為一樣就真係第一次, 平時最多都係試脆皮叉燒包咋! 呢個墨西哥叉燒包個體型唔算好大, 個皮好軟熟, 入口就要小心, 皆因裡面嘅叉燒都幾熱下, 入口後感覺都幾特別, 外面脆中帶甜, 而餡料就咸中帶熱, 非常特別, 雖知唔係個個人都喜歡, 但師傅就十分欣賞, 呢款點心亦屬必食推介!黃沙豬潤腸不其然令師傅想起堂記嘅豬潤腸, 而呢間食店嘅豬潤都幾香, 味道唔苦, 加上腸粉亦十分滑身, 都唔錯, 不過如果和同堂記相比下, 師傅還是偏愛堂記! 而於金錢肚同埋菜苗餃就普普通通, 金錢肚炆得夠腍同入味, 味道香香辣辣, 都可以; 而菜苗餃嘅皮亦造得幾薄, 絕對唔厚唔韌, 餡料清爽, 都算可以!總括黎講食物質素不俗, 環境舒服, 可能比較夜, 所以唔太逼, 而服務亦友善殷勤, 價錢就唔貴, 埋單都係舊幾水, 每人幾草野, 絕對抵食! 能夠和好友食家"乜都放入窿"食完粥再食點心確實係恩典, 加上好友食家"乜都放入窿"越食就越精神, 真的感恩! 兩個地方雖然不算太滿足, 但總比一個地方過癮, 而呢間食店一至認為笑臉走唔甩, 有機會都會再黎!

順德村煲仔生滾粥 (佐敦)

師傅都好耐冇同好友食家"乜都放入窿"單獨食飯, 數下手指都有至少兩個多月, 於是師傅就相約一個飯局! 同好友食家"乜都放入窿"食飯就最爽, 皆因佢人如其名, 真係乜都放入口(窿), 所以可以試好多不同菜式和不同類別的食店; 可惜是次好友食家"乜都放入窿"喺飯局前一天開始病, 所以未到飯局當天, 亦唔知當晚食咩好, 皆因有可能取消嘛!

到了飯局當天, 師傅再細問好友食家"乜都放入窿"係咩情況, 而好友食家"乜都放入窿"就話飯局可以, 不過以清淡為主; 有見及此, 師傅就決定同好友食家"乜都放入窿"食粥清清腸胃! 於是又上黎開飯網搜尋, 結果見到呢間食店又高分, 又就腳, 最重要係喺師傅個環頭, 仲要從未試過, 所以就決同好友食家"乜都放入窿"定黎呢間食店!

約實好友食家"乜都放入窿", 大家準時會合, 於是就向著目的地進發! 當抵達後發現店內食客非常之多, 可幸兩個人, 所以只需等一陣就已經有位! 一坐底即刻睇下有咩吸引, 見到粥嘅種類甚多, 有幾款都幾吸引, 於是同好友食家"乜都放入窿"商量後, 就決定一人揀一款粥, 再加小食; 於是好友食家"乜都放入窿"就柯打滑雞魚雲粥, 而師傅就揀左魚片豬腰粥, 再配上兩款小食豉油炒腸粉同埋糖心皮蛋!

落完單後, 同好友食家"乜都放入窿"吹下水, 唔使好耐兩款粥已經放左喺枱面上, 謝主隆恩之後, 就即刻開餐! 師傅先講下魚片豬腰粥, 呢個粥底入口非常之綿, 而味道夠清, 冇味精, 淨係個粥底已經好正; 而配料係魚片同豬腰, 坦白講平時師傅一定唔食魚片, 皆因怕腥同怕骨, 而是次揀魚片全因呢間食店係以魚類作主打, 所以點都要試下! 魚片入口唔腥, 肉身鬆甜, 基本上都好得, 不過始終有太多骨, 唔太啱口味; 而豬腰就勁爽口, 冇異味, 勁正; 扣除師傅本身嘅唔鍾意, 呢個粥真係幾正!再講下好友食家"乜都放入窿"的滑雞魚雲粥, 魚雲師傅冇試過, 因真係太多骨, 不過雞師傅就有幸一試, 雞身真的幾滑, 雖魚煲左粥, 但雞身絕不韌身, 真的非常可口, 好正呀! 至於豉油炒腸粉亦真的炒得幾香, 味道唔會過咸, 調得洽到好處, 加上唔油, 真係非常之掂, 絕對係必食推介! 糖心皮蛋又真係幾糖心, 溶住咁放入口, 感覺非常滿足, 加上入口金屬味唔重, 都可以一試!總括黎講食物質素不俗, 環境唔會話勁舒服, 不過都接受到, 地方清潔, 服務有禮, 價錢就非常相宜, 埋單一百零三蚊, 抵食喎! 師傅同好友食家"乜都放入窿"食飽後仲可以坐喺底傾下計, 店員亦冇驅趕, 不過當時亦冇食客等候! 呢間食店真係有料到架, 二十一個食評, 廿個笑臉, 零喊臉, 得四點一分嘅優異成績! 是次乜東飯局令兩位食家都非常滿意, 所以笑臉師傅比硬, 計埋呢個食評, 將會成為第廿一個笑臉, 有機會定必再黎!

馬家莊清真館 (深水埗)

黑食會嘅聚會都算非常頻密, 所以有時都難免唔齊人; 就好似呢一次大聲要幫阿公做野, 所以黎唔到做冬; 於是就只剩底肥鄧, 串爆同吹雞, 大家一致決定要搵一間大家都想食嘅食店, 而呢間食店要以羊肉為主打! 一講到食羊就點可以唔黎呢間食店, 加上串爆從來都未試過, 所以就約埋一齊行去呢間食店!

當然訂位乃係必要, 去到食店發覺人都唔多, 不過照例同伙計講訂左枱, 最後就被帶到一張卡位, 坐底後立即睇下有咩好食, 經過一輪商議後, 一致決定柯打清燉羊肉湯, 羊肉粗炒, 京蔥羊肉餡餅, 孜然羊肉, 蒜蓉炒白菜仔同埋羊肉鍋貼!

落完單唔使等好耐就已經有得食, 第一道登場的是清燉羊肉湯, 清燉羊肉湯柯打左中size, 未入口已經聞到羊肉勁香酥, 非常吸引, 再入口發覺湯嘅味道非常清甜, 而濃濃的酥香味透過湯裡散發出黎, 湯料嘅羊肉非常鬆軟, 入口仍然酥香, 超級之正, 絕對係嗜羊者必食之選! 之後再試羊肉粗炒, 羊肉粗炒略嫌炒得油少少, 不過羊肉依然香酥, 可以一試!京蔥羊肉餡餅係逐件柯打, 三個人當然係叫三件, 羊肉餡餅個餅底做得好薄身, 薄得黎又可以盛載到成個羊肉餡料, 而且唔會穿, 入口就發覺濃濃的湯喺餡餅裡浸出黎, 湯香甜超討好, 配上羊肉香酥, 亦係另一道必食之選! 至於孜然羊肉味道夠香夠辣, 除此之外就冇咩特別; 蒜蓉炒白菜仔嘅白菜都幾嫩綠新鮮, 不過炒得油少少; 最後係羊肉鍋貼一客有五隻, 羊肉鍋貼煎得好白脆, 餡料內亦有濃濃的湯汁, 而羊肉係非常酥香吸引, 亦係一道必食推介!總括黎講食物水準非常出色, 地方都唔算太細, 而且都幾乾淨, 服務亦友善, 三條友埋單三百六, 每人都係講緊百二蚊, 有咁高水準, 絕對抵食! 當食完呢一餐後, 大家都已經非常之飽, 所以連甜品都唔使食, 用呢一間食店作為黑食會之做冬真的非常完美, 所以笑臉係一定要比, 相信唔使幾耐一定會再黎!

越富閣越南餐廳 (天水圍)

上個月中師傅難得有個悠長假期, 於是趁著假期就過黎呢個商場行下, 順便又搵下野食! 講真一兜友都唔知食咩好, 行行下見到呢間越南餐廳, 又見咁耐冇食過, 加上食店又唔多人, 於是就決定盲中中咁行入去啦!

入到去坐底見到有個超值自選午餐, 再望下其他餐牌, 好似又冇咩特別吸引, 於是就決定柯打一碗檬粉, 但食咩檬好呢 呢樣就難左師傅好耐, 心又想要香茅豬扒, 另一邊又諗越式燒蝦餅, 最後還是揀咖哩牛腩, 再加杯凍檸檬茶! 其實咖哩牛腩理應配白飯, 配上湯檬還是首次, 不過唔知點解始終覺得格格不入!

落完單, 就坐喺度等, 可幸唔需要等太耐! 咖哩牛腩湯檬終於登場, 賣相唔算吸引, 就淨係覺得咖哩都幾濃, 先試湯底, 除了咖哩味外還是咖哩味, 所以湯底冇咩特別, 而碗內除了牛腩外, 還有少量薯仔; 師傅於是先試著仔, 著仔夠諗同有咖哩味, 所以都算不錯; 至於主角牛腩都炆得幾腍, 不過唔香, 最重要呢份牛腩係冇咖哩味, 如明顯係係就咁將啲汁淋上面! 至於檬粉就冇咩特別, 不過值得一提係呢間越南餐廳係冇是拉差辣椒醬, 反而係比豆椒醬, 如明顯食店係勁冇心啦, 是拉差辣椒醬都冇就倒不如唔好開越南餐廳啦! 凍檸茶冇茶味冇檸檬味, 加上勁甜, 失敗!總括黎講食物質素普通過普通, 從辣椒醬就睇得出食店冇咩心, 境就就一般, 都算乾淨清潔, 價錢三十蚊一個餐, 凍飲加三雞, 仲要加一, 埋單三十七, 唔算抵食! 幸好當日係師傅嘅假期, 否則都咪話唔氣頂, 喊臉一定要比, 淨係冇是拉差辣椒醬就已經要喊啦, 所以肯定唔會有下次!